يَا مْبرِّمَةْ الفلَكْ (شعر شعبي)

مِنْ يُومْ ما تْفَارقْنا يَا مْبرِّمَةْ الفلَكْ
يَا مْفارقةْ محبوبكْ ومغرِّبَةْ الغريبْ
نْزَل الشِّقَا في قَلْبِي مَا ثَمْ من ضِحَكْ
والوَقِتْ لِيذَا يُضرُبْ بِخْنَاجْرَهْ يصِيبْ
مكْتوب يَا راميني عَالضيم والدركْ
يَا مقرِّبْ البِعايدْ ومبعِّدْ القِريبْ
يَا قمِرْتي في ليلي يَا ناصْبَةْ الشَّركْ
مِنْ يوم شُفِتْ عيونكْ والعينْ في نِحيبْ
يَا امَّرضِتني منِّكْ يَا امْجمِّدَةْ الحَركْ
كِيفْ الدُّوَا للعِلَّةْ والـمَرضْ مِالطبيبْ
طال الفراق وهَمَّهْ والـمَشي عَالحسكْ
والصَّبِرْ يَا ما اَمرَّهْ في فُرْقِةْ الحَبيبْ
نايْ ضَاعْ قلبي منِّي وهْلكْ مِنْ هَلكْ
والعُمرْ غِيمةْ عدِّتْ ما خلِّفتْ خِصيبْ
مِلْ فَارقتني هِيَّ تخبِّطتْ كِالسَّمكْ
فُوقْ الثَّرى نِتْخبِّطْ مِالفجرْ للمِغيبْ
لا حَيْ لاني ميِّتْ مملوكْ مِنْ مِلَكْ
لا غِبتْ لاني حاضِرْ ونْبان لو نِغيبْ
إِنْتِ الهوى ومحونَهْ وإِنْتِ ضيَا الحلَكْ
وإِنْتِ الغرام وموجَهْ وإِنْتِ البها والطيبْ
والحب إِنْتِ سرَّهْ في الرُّوح كِي سَلَكْ
سبحان رب لخلقكْ مِنْ يخلق العَجيبْ
بالكْ يريد المولى مِنْ متّن الحُبُكْ
يلمْ شَمِلْنا يرحمنا ويبْرّد اللهيبْ
وتفرّحي مِنْ حبّكْ وحظاكْ ما تَركْ
للغير بعد عيونكْ في خاطره نصيبْ
بَعْدِ الفراقْ وهُولهْ يتْقَطَّعْ الشَّبَكْ
وتعود هاكْ الضُّحكْةْ والظن ما يخيبْ
غير اصبري واستنِّي لو غبت نَا مَعكْ
قلبي حذاكْ ورُوحي بخواطْري قِريبْ
بقصَايْدِي باشْعَاري باشْواق ما تِفُكْ
بلامحي وبطِيفي بِمْشَاعري رِقيبْ
كْي رحْلِتْ ما ودعتكْ لكْن رحيلي لكْ
الحَقْ لازم يظهر واللي خْلَقْ حْسِيبْ

طرابلس
‏30‏/11‏/2007‏ 02:02:47 ص