يا آسْيَةْ (شعر شعبي)

< 1 دقيقة للقراءة

يا آسْيَةْ عِينيكْ دايَا مِنْهُمْ
نِحْلفْ يِهونْ الـعُمرْ ما نْهوِّنْهُمْ
****
منْهُمْ دايَا
يا آسْيَةْ عِينيكْ قلُّو هْنـايَا
زادُوا شقايَا وكاتْمِينْ هوايَا
ولا نْخُونْ عَهدْ الـوِدْ لا نخوِّنْهُمْ
يِحْكي عَليكْ القَلبْ ألفْ حْكايَةْ
اِنْحِرقُو ضُلوعِي والهَوى ساكنْهُمْ
****
ضُلوعِي اِنحرقُو
مْثيلْ الْمَراكِبْ في غرَامكْ غرقُو
عَالْمُوج يَرقُو بدمِعْ عِيني شرقُو
وفـي سِبرْهُمْ لـيـَّامْ مـا نِمِّنْهُمْ
راحُو سِنينْ الـعُمرْ منِّي اِنسرقُو
وصَبْـرِي علَى لـيـعاتهُمْ جنّنْهُمْ
****
صـَابِرْ سِنين طويلَهْ
وعدِّيـتـهُمْ لـيَّـامْ مثل الـنِّيلَهْ
مـا لقِيتْ صاحِبْ علِّتي نِشْكيلَهْ
مـليـُوعْ وعْيوني السَّهرْ سْكنْهُمْ
رَامُو ظَلامْ الـشُّوقْ َطْوَلْ لِـيلَهْ
مثِيـلْ الـيتـَامَى حدْ ما يطمَّنْهُمْ
****
رَامُو ظَلامْ أشـواقِكْ
الـمُرْ بُعدك والـجَـحيـمْ فراقِكْ
زُزْت الدَّركْ وتْلِفتْ في رقراقِكْ
شْوونِي عُيـونِكْ شـوقهُمْ حزِّنْهُمْ
نِكْتِبْ قَصايِدْ حُبْ فُـوقْ أَوْراقِكْ
لِيلْ السَّهَرْ بـمْدامْعِي نْزيِّنْهُمْ
****
نِكْتِبْ علِيكْ قْصِيدِي
والحُبْ يا مَحْبُوبْ ما هُو بِيدِي
يْتوِّقْ لِهيبْ الشُّوقْ في تَنْهِيدِي
يلَـهِمْ وِريدِي غْصَـايْصِي دافـِنْهُمْ
زيدِي تِنـاهِيدْ الكِنينْ وْزيدِي
يِتْفجُّرو في الـصَّدِرْ لـَوْ نِخْزِنْهُمْ
****
زيدِي علَى تَعْذيبِي
اِنْتِ علِّتي واِنْتِ الدُّوا وطْبيبِي
واِنْتِ حَبيبِي يا سبَبْ تعْطيبِي
عيـونِكْ خَنـاجِرْ مزِّقُو حـاضِنْهُمْ
مازن بعثِتْ سْلاَمْ في مْكاتيبِي
الـحَقْ فيـهُمْ والـذَّهَبْ مَعْدنْهُمْ
****
يا آسْيَةْ عِينيكْ دايَا مِنْهُمْ
نِحْلفْ يِهونْ الـعُمرْ ما نْهوِّنْهُمْ

الرواضي 14-04-2004