“علاش ناوية” مراوحة بين الفصحى والشعر الملحون (الشعبي التونسي).
< 1 دقيقة للقراءة
….
بلاد على حافة الهاوية
ذئاب على تلة عاوية
عقول وأفئدة خاوية
فقولي بلادي: علاش ناوية؟؟
…
علاش ناوية قوليلي
علاش لاش ديما محيرتلي دليلي
لا فسرك شعري ولا تأويلي
لا غيث ينزل لا شموسك ضاوية
لا القمح قمحي لا القصيل قصيلي
بكثر الشقا والهم أرضك راوية
…
علاش ناوية يا حرّة
والحر ما يقبل مذلة مَرّة
وراهي المذلة لغير ربي مُرّة
علاش ترهبي ونا ما حسبتك حاوية
ناديت ما ردّوا النبا بالجُرّة
وعيطت ما فزعوا شيوخ الزاوية
علاش ناوية
…
إن الذي خلق الجمال وأبدعه
قد صاغ حسنك يا بلاد ونوّعه
هل ضاع وجهك أم سبته الأقنعه
ومن ذا الذي ألقاك وسْط الحاوية
لم يبق حلم في عيون الأشرعة
إن الضمائر في بلادي ثاوية
فقولي بربك: علاش ناوية؟؟؟
….
علاش ناوية في راسك
وشكون مرر يا بلادي كاسك
وشكون شاري كيف باعوا ناسك
لا خيل تنهم لا مدافع داوية
هزي عيونك والعني خنّاسك
وكل من غدر اصليه نار الكاوية
…..
هزي عيونك فزّي
وعِزي بروحك ذكريني بعزي
لمتين تبكي وترجفي وتعَزّي
داوي جراحك واخرجي م الهاوية
م الهم والتخمام كفّي يزّي
كانك على الامجاد باقي ناوية
تونس
15 مارس 2017
