نحبك

#نحبك

قصيدة من الشعر الشعبي كتبتها سنة 2006، وقمت بإعداد مقطع منها بالذكاء الاصطناعي ضمن ألحان ذات تسارع  مختلف.
أي توزيع أعجبكم أكثر؟؟

الكلمات:

نْحِبِّكْ عَلَى رُغْمِ الزَّمَانْ وڨورَهْ
وِمْحَايْنَهْ وِشْرُورَهْ
عْشَڨتِكْ جَعَلتِكْ فِي الهَوى أُسْطُورَهْ

—

نْحِبِّكْ عَلَى رُغْمِ الزَّمَانْ وڨيمَهْ
وِمْحَايْنَهْ وِتحْطِيمَهْ
عْشَڨتِكْ جَعَلتْ الْحُبْ ڨصَّةْ عظيمَهْ
إِنْتِ غَرامْ الـڨَلِبْ ديـمَا ديـمَهْ
وِاِنْتِ ضِياهْ وِنُورَهْ
ولا ثَمّ مِثل هْواكْ فِي الـمَعمُورَهْ

—

نْحِبِّكْ عَلَى رُغْمِ الزَّمَانْ وشرَّهْ
وَرُغْمِ الـسِّنين الْمُرَّهْ
سْوَى الدَّهرْ يِكْوِي الـڨَلِبْ ولا يِسُرَّهْ
إِنْتِ الهَوى والْحُبْ وِاِنْتِ الحُرَّهْ
لْمَا تِهابْ مِنْ سامُورَهْ
وأَهْل الغَرام ذْنُوبْهُم مَغْفُورَهْ

—

نْحِبِّكْ عَلَى رُغْمِ الزَّمَانْ وحِيفَهْ
وِمْحَايْنَهْ وِتْصْرِيفَهْ
هَدِيتِكْ مَشَاعِر صَادْڨَهْ وِنْظِيفَهْ
إِنْتِ الغَرامْ لْمَا عَرَفْتِشْ كِيفَهْ
ولا كْتَبْتِ مِثل سْطُورَهْ
خَلَّى الـعُيونْ دْمُوعْهَا مَحْدُورَهْ

—

نْحِبِّكْ عَلَى رُغْمِ الزَّمَانْ وظْلْمَهْ
والْحُبْ أَجْمَلْ كِلْمَهْ
الْحُبْ نُورْ يِشَعّ وَسَطْ الظْلْمَهْ
إِنْتِ غْرامْ الـڨَلِبْ وِاِنْتِ حِلْمَهْ
لا سْوَاكْ يِڨْصُدْ شُورَهْ
لا الـغِيرْ يِلْڨى لا الـغِريبْ يِزُورَهْ